Ferrol, 9 de xuño de 2026. A Garda Civil, a través de efectivos do Sector de Tráfico de Galicia, investiga un home de 45 anos como presunto autor de dous delitos contra a seguridade viaria, tras ser identificado como o condutor dun vehículo que circulaba a 219 quilómetros por hora nun tramo limitado a 100 km/h e carecer de permiso de condución en vigor.
Os feitos tiveron lugar na noite do pasado 31 de maio, arredor das 21:37 horas, durante un control de velocidade establecido por un radar móbil do Destacamento de Tráfico da Garda Civil de Ferrol na autopista AP-9F.
Segundo informou a Benemérita, os axentes detectaron un turismo que circulaba a 219 km/h á altura do punto quilométrico 33,300 da citada vía, superando amplamente a velocidade máxima permitida nese tramo, fixada en 100 km/h. A velocidade rexistrada excede en máis de 80 km/h o límite establecido para vías interurbanas, circunstancia que constitúe un delito contra a seguridade viaria segundo a lexislación vixente.
Ao non ser posible interceptar o vehículo no momento da infracción, o Equipo de Investigación de Sinistros (EIS) iniciou de inmediato as correspondentes pescudas para esclarecer os feitos. As investigacións permitiron localizar de maneira inequívoca o turismo e identificar plenamente o seu condutor.
Durante as comprobacións documentais realizadas posteriormente, os axentes constataron ademais que o investigado carecía de permiso de condución válido, ao terse declarado a perda definitiva da súa vixencia.
As dilixencias instruídas pola Garda Civil foron remitidas ao Tribunal de Instancia de Garda de Ferrol, que será o encargado de continuar coa tramitación xudicial do caso.