O goberno municipal, en colaboración coas ANPAs e as direccións dos centros educativos, levou a cabo diversas actuacións de mellora nas instalacións escolares co obxectivo de garantir unhas condicións adecuadas para o alumnado e o persoal docente.
Dende o BNG valoran positivamente o esforzo realizado por todas as partes implicadas para sacar adiante unhas obras que consideran imprescindibles e que, segundo lembran, son competencia da Xunta de Galicia. A formación nacionalista destaca que estas actuacións permitiron dar resposta a necesidades urxentes que levaban tempo pendentes e que xa non admitían máis demora.
“Os gobernos do BNG non venden fume”, sinalan dende a organización, ao tempo que felicitan ao executivo municipal, ás asociacións de nais e pais e ás direccións dos centros polo seu compromiso e capacidade para desbloquear unha situación que afectaba directamente á comunidade educativa.
Con todo, o BNG insiste en que a responsabilidade de acometer estas melloras corresponde á Xunta de Galicia, á que reclama que asuma as súas obrigas e resolva de maneira definitiva todas as deficiencias existentes nos dous centros educativos.
A formación considera que a educación pública debe contar cos recursos e investimentos necesarios para garantir instalacións seguras e de calidade, polo que continuará esixindo á administración autonómica que cumpra coas súas competencias e responda ás demandas da comunidade educativa.