A poucos días do inicio das festas de Vilaño, previstas para o 18 de xullo, a indignación medra entre os veciños e veciñas de Vilanova, que cargan duramente contra o Concello da Laracha polo que consideran un novo exemplo de abandono e falta de igualdade no reparto dos servizos municipais.
A principal queixa céntrase na limpeza das marxes das estradas. Segundo denuncian os residentes, o tractor municipal realizou os traballos na Gándara, continuou por Montesclaros e seguiu cara a San Román, deixando sen limpar o tramo correspondente a Vilanova, precisamente situado entre esas zonas. A maleza invade a vía, reduce a visibilidade, dificulta o paso dos vehículos e obriga ás persoas que camiñan a circular practicamente pola estrada, ao desaparecer incluso as cunetas nalgúns puntos.
Os veciños consideran especialmente grave que esta situación se produza en pleno verán, cando o risco de incendio é elevado, e denuncian a falta de prevención tanto nas estradas como nos montes da contorna.
As críticas tamén se dirixen ao servizo de recollida do lixo. Aseguran que Vilanova só dispón dun contedor para abastecer unha granxa e seis vivendas, malia levar meses solicitando ao Concello a instalación dun segundo. Ademais, denuncian que a recollida se realiza unha única vez por semana, mentres noutras zonas próximas o camión pasa dúas veces, a pesar de que todos os veciños pagan as mesmas taxas e impostos.
A veciñanza lamenta sentirse cidadáns de segunda e acusa ao Concello da Laracha de desatender sistematicamente as necesidades de Vilanova. Reclaman que se actúe con criterios de igualdade e que se deixen de facer diferenzas entre núcleos de poboación á hora de prestar servizos básicos.
Os residentes esixen solucións inmediatas: a limpeza da maleza, un reforzo da recollida do lixo, a instalación dun segundo contedor e un maior compromiso do Concello coa seguridade e coa calidade de vida dos veciños de Vilanova.
«Non pedimos privilexios, só o mesmo trato que reciben o resto das aldeas do municipio», resumen os afectados, que advirten de que o seu malestar vai en aumento ante o que consideran unha situación xa insostible.