Veciños e veciñas de Arteixo trasladan as súas queixas pola acumulación de maleza e vexetación nunha finca de titularidade privada, unha situación que, segundo denuncian, está a xerar molestias e preocupación entre as persoas residentes na zona.
A falta de limpeza e mantemento da parcela provoca a acumulación de vexetación, incrementando o risco de aparición de animais e insectos e, especialmente durante os meses de maior calor, a preocupación veciñal ante un posible risco de incendio.
As persoas afectadas reclaman que a entidade ou persoa propietaria da finca cumpra coas súas obrigas de conservación e proceda á limpeza da parcela para evitar que a situación continúe empeorando.
Ao mesmo tempo, os veciños cuestionan o papel do Concello de Arteixo como administración responsable de velar polo cumprimento da normativa municipal e pola seguridade e salubridade dos espazos privados cando estes poden afectar ao interese xeral.
Neste sentido, reclaman que o Concello actúe ante a situación e, se procede, requira á propiedade a limpeza da finca. Tamén sinalan que, no caso de producirse danos derivados da falta de mantemento e de existir responsabilidade administrativa, o Concello podería ter que responder civilmente de maneira subsidiaria nos supostos que determine a normativa aplicable.
A veciñanza pide, polo tanto, unha solución antes de que a acumulación de maleza derive nun problema maior e reclama tanto á propiedade como á Administración que adopten as medidas necesarias para garantir unhas condicións axeitadas de limpeza, seguridade e salubridade na contorna.