A actuación, financiada pola Xunta de Galicia con 414.137 euros, permitirá solucionar os problemas que afectaban desde hai anos ao tellado do centro educativo
As obras de renovación da cuberta do IES Eduardo Pondal de Ponteceso avanzan a bo ritmo, nunha actuación que permitirá mellorar de maneira notable as condicións de seguridade, conservación e mantemento do edificio.
Segundo explicou o alcalde de Ponteceso, José Manuel Mato, os traballos permitirán poñer solución a diversos problemas que se viñan producindo desde hai anos e que afectaban ao estado da cuberta do instituto.
A intervención conta cun investimento de 414.137 euros achegados pola Xunta de Galicia, e responde a unha das principais demandas trasladadas pola comunidade educativa do centro.
A renovación da cuberta permitirá corrixir as deficiencias existentes e contribuír a garantir unhas instalacións máis seguras e adecuadas para o alumnado, o profesorado e o resto do persoal do IES Eduardo Pondal.
Desde o Concello de Ponteceso destacan a importancia desta actuación para a mellora das infraestruturas educativas do municipio e valoran positivamente o avance dos traballos, que permitirán solucionar unha problemática que se viña arrastrando desde hai tempo.
