O Campo de Fútbol Municipal Vicente Carril de Camariñas conta xa cunha nova rede de contención que permitirá mellorar o funcionamento e a seguridade das instalacións deportivas.
A actuación responde a unha demanda do club e ten como principal obxectivo evitar que os balóns saian dos límites do recinto, facilitando así o desenvolvemento dos adestramentos e dos partidos e facendo máis cómodo o traballo diario de xogadores, corpo técnico e persoal encargado das instalacións.
Desde o club queren agradecer ao Concello de Camariñas a súa disposición para atender esta petición e colaborar na mellora das condicións do campo.
Pequenas actuacións como esta contribúen a seguir coidando e mellorando as instalacións deportivas e, sobre todo, a ofrecer un espazo máis axeitado para a práctica do fútbol en Camariñas.