O lume, que se orixinou na planta baixa dun inmoble de tres alturas, obrigou a trasladar os afectados ao CHUAC
Dúas persoas foron evacuadas ao Complexo Hospitalario Universitario da Coruña (CHUAC) tras declararse un incendio durante a madrugada deste martes nunha vivenda situada na intersección entre a avenida de Hércules e a rúa Ramón del Cueto, na Coruña.
Varios particulares alertaron o 112 Galicia arredor das 3:30 horas ao observar unha importante fumareda procedente do inmoble e escoitar varias persoas que pedían axuda no seu interior.
De inmediato, os xestores do Centro Integrado de Atención ás Emerxencias (CIAE) 112 Galicia solicitaron a intervención de Urxencias Sanitarias de Galicia-061, dos Bombeiros e dos efectivos da Policía Nacional e da Policía Local da Coruña.
Pouco despois das 4:20 horas, os bombeiros confirmaron que o incendio estaba extinguido. Segundo informaron os servizos de emerxencias, o lume queimou materiais que se atopaban acumulados na planta baixa da vivenda, un inmoble de tres alturas.
Pola súa banda, os servizos sanitarios atenderon as persoas afectadas e trasladaron dúas delas en ambulancia ao CHUAC para recibir asistencia médica.
As circunstancias nas que se orixinou o incendio están pendentes de esclarecer.