A falta de sinalización dunha zona peonil xunto ao colexio e o mal estado dalgunhas vías en Meirás xeran malestar entre a veciñanza
A volta ás aulas en Valdoviño chega acompañada de novas queixas veciñais relacionadas co estado e o mantemento dos espazos públicos. Este 9 de setembro, coincidindo co inicio do curso escolar, veciños e familias reclaman ao Concello que se proceda canto antes ao pintado e sinalización da zona peonil situada nas proximidades do colexio.
Segundo trasladan, a zona destinada ao tránsito peonil aínda non estaría correctamente pintada, unha situación que consideran especialmente preocupante nestas datas, cando aumenta o movemento de nenos, adolescentes e adultos que camiñan diariamente ata o centro educativo.
A petición veciñal é clara: que se acondicione e sinalice a zona para garantir un percorrido seguro para as persoas que se desprazan a pé ata o colexio.
“Que debería de estar xa pintado a zona peatonal”, sinalan os veciños, que reclaman que o Concello tome medidas para evitar situacións de risco e facilitar o acceso seguro ao centro escolar.
Queixas tamén en Meirás
As reclamacións polo estado das infraestruturas esténdense tamén á parroquia de Meirás, onde veciños denuncian o mal estado de diferentes vías.
A deterioración do firme e as condicións dalgunhas estradas están a provocar malestar entre a poboación, que reclama actuacións de mantemento e reparación por parte da administración competente.
As demandas poñen novamente sobre a mesa a necesidade de manter en boas condicións as vías e os espazos destinados tanto á circulación de vehículos como ao tránsito peonil, especialmente en zonas con presenza habitual de menores e familias.
A veciñanza agarda agora que estas reclamacións sexan atendidas e que se adopten medidas para mellorar a seguridade viaria e peonil no municipio.
