Camariñas, setembro de 2026. A praia do Ariño, no Concello de Camariñas, foi o escenario dunha nova xornada de limpeza desenvolvida no marco do proxecto Diversiplás, unha iniciativa orientada á sensibilización ambiental e ao coidado da costa e do medio mariño.
A actividade reuniu persoas usuarias, voluntariado e veciñanza, que participaron activamente na retirada de residuos da praia. Ao longo da mañá, o traballo en equipo e o compromiso coa protección do litoral foron os grandes protagonistas dunha xornada marcada pola participación e a concienciación ambiental.
Desde a organización destacan a importancia de cada pequeno xesto para contribuír á conservación dos espazos naturais. “Cada residuo que retiramos, cada persoa que participa e cada xesto de compromiso… todos suman”, sinalan.
A xornada deixou tamén numerosas imaxes que reflicten o ambiente de colaboración e implicación das persoas participantes, nunha actividade que combina acción directa sobre o territorio e sensibilización sobre a problemática dos residuos no medio mariño.
Última oportunidade para participar
O programa Diversiplás continúa coa súa última actividade de limpeza, que terá lugar na praia de Balarés, no Concello de Ponteceso, o luns 14 de setembro, entre as 10:00 e as 13:00 horas.
A iniciativa está promovida por Íntegro e conta co cofinanciamento da Unión Europea, a Xunta de Galicia e o GALP Costa da Morte.
Coa campaña, as entidades promotoras animan á cidadanía a seguir implicándose no coidado do litoral e a converter a participación e a responsabilidade ambiental nun compromiso colectivo.
Porque na protección da nosa costa, cada acción conta e todos sumamos.
