A formación nacionalista critica o atraso nos traballos e reclama ao Concello que esixa á Xunta garantías antes de recibir a obra.
O BNG de Porto do Son denunciou o estado do pavillón polideportivo do IES de Porto do Son, no que, segundo sinala a formación, se produciron filtracións de auga no interior da instalación tras as fortes choivas rexistradas a semana pasada, malia as obras de reparación que se están a executar.
A denuncia coincide co segundo aniversario do temporal que derrubou as paredes do pavillón. Despois dun longo período de espera, os traballos de reposición comezaron o pasado 11 de maio e contaban cun prazo de execución de tres meses. Porén, cinco meses despois do inicio das obras, os traballos continúan sen rematar, segundo denuncia o BNG.
Desde a formación nacionalista consideran preocupante que, tras as primeiras precipitacións intensas, volvesen aparecer problemas no interior do edificio. Esta situación, aseguran, pon en cuestión o resultado das actuacións realizadas e a necesidade de comprobar que a instalación reúne as condicións axeitadas para o seu uso educativo.
Reclaman garantías antes de recibir a obra
O BNG explica que levou esta cuestión ao último pleno municipal, no que solicitou ao goberno local que reclame á Consellería competente que non dea por recibida a obra sen comprobar previamente que non existen filtracións e que o pavillón cumpre todas as garantías necesarias para desenvolver nel a actividade docente.
A formación nacionalista pide así que se priorice a seguridade e o benestar da comunidade educativa e que se verifique o estado real das instalacións antes de dar por concluídos os traballos.
O BNG de Porto do Son critica, ademais, o que considera unha subordinación dos intereses da comunidade educativa aos intereses partidarios do PP, e insta o goberno municipal a esixir á Xunta que a reparación se complete con todas as garantías.
A formación insiste na necesidade de que o pavillón quede en condicións adecuadas para o seu uso e de que se resolvan os problemas detectados antes de que a obra sexa recibida definitivamente.
