A vítima resultou afectada pola inhalación de fume nun lume que calcinou unha campá extractora, unha tixola e parte do mobiliario da cociña.
Unha persoa tivo que ser trasladada ao hospital este sábado tras resultar afectada pola inhalación de fume nun incendio rexistrado nunha vivenda da Coruña.
O lume iniciouse arredor das 16:00 horas nun piso situado na praza de Esteban Lareo Castro. Segundo informaron varios particulares ao 112 Galicia, escoitábanse berros e observábase a saída de fume pola ventá do edificio.
Tras recibir o aviso, o Centro Integrado de Atención ás Emerxencias (CIAE) 112 Galicia mobilizou o Servizo de Urxencias Sanitarias de Galicia-061, os Bombeiros da Coruña e efectivos da Policía Nacional e da Policía Local.
Unha vez controlado o incendio, os bombeiros informaron de que arderan unha campá extractora, unha tixola e parte do mobiliario da cociña.
Como consecuencia do suceso, unha persoa tivo que ser evacuada ao hospital de referencia por inhalación de fume.
