O nodo Conectivi.gal recolle ferramentas para a xestión administrativa, as cidades intelixentes, a seguridade, a mobilidade e a promoción da cultura, a educación e o turismo.
Santiago de Compostela, 2 de novembro de 2026.– O nodo galego de conectividade Conectivi.gal, promovido pola Axencia para a Modernización Tecnolóxica de Galicia, vén de elaborar un catálogo con 17 casos de uso de solucións tecnolóxicas destinadas ás administracións públicas e aos servizos públicos.
A iniciativa reúne ferramentas baseadas en sensores, redes de telecomunicacións, plataformas de datos, intelixencia artificial e realidade virtual, co obxectivo de mellorar a eficiencia da xestión pública, optimizar os recursos dispoñibles e ofrecer servizos máis accesibles e próximos á cidadanía.
O catálogo estrutúrase en catro ámbitos de actuación: xestión da Administración, con catro proxectos; cidades e vilas intelixentes, con cinco; seguridade e mobilidade, con outros cinco; e cultura, educación e turismo, con tres.
Solucións para unha Administración máis eficiente
Entre as ferramentas incluídas figura un sistema de auditoría da xestión de residuos que analiza os datos de cada zona para dimensionar adecuadamente os colectores, os vehículos e o persoal necesario.
O catálogo incorpora tamén solucións para automatizar o acceso a instalacións públicas, como espazos deportivos, museos e centros culturais. Estas ferramentas permiten que as persoas usuarias accedan ás instalacións reservadas a través do teléfono móbil, sen necesidade de contar con persoal presencial para abrir os espazos.
No ámbito agrario, outra das propostas emprega sensores para monitorizar o solo e os cultivos, facilitar o asesoramento especializado, anticipar posibles pragas e optimizar o uso de fertilizantes e outros recursos. Ademais, recóllense ferramentas para controlar entradas, accesos e fluxos de persoas en edificios públicos.
Tecnoloxía para cidades e vilas intelixentes
A planificación urbana é outro dos eixos do catálogo. Entre as solucións destaca a creación de réplicas dixitais do territorio, que permiten integrar información municipal nunha representación virtual do concello para apoiar a toma de decisións.
Estes sistemas facilitan a análise dos posibles efectos de eventos, obras ou cambios nas condicións climáticas e contribúen a mellorar a planificación dos servizos municipais.
O apartado inclúe tamén ferramentas de monitorización ambiental, cámaras intelixentes, sistemas para visualizar e controlar información relacionada co tráfico e a meteoroloxía, así como solucións de xestión remota de infraestruturas e servizos públicos.
Transporte conectado e seguridade
No ámbito da seguridade e a mobilidade, o catálogo recolle sistemas de marquesiñas intelixentes e transporte conectado. A través de sensores e información avanzada nas paradas de autobús, estas solucións permiten ofrecer datos actualizados sobre os tempos de espera e planificar rutas en función dos patróns de uso.
A oferta complétase con ferramentas para a xestión de pasos de peóns, visores territoriais en tres dimensións e sistemas de control intelixente de edificios. Estas últimas solucións permiten supervisar os consumos e contribuír á seguridade das instalacións mediante o uso da intelixencia artificial.
Novas ferramentas para a cultura, a educación e o turismo
O cuarto ámbito céntrase na creación de servizos dixitais compartidos e na mellora da xestión dos espazos culturais e educativos.
Unha das propostas consiste nun ecosistema aberto de aplicacións municipais que proporciona unha base tecnolóxica común para desenvolver servizos e conectar dispositivos. Este modelo busca evitar solucións illadas, favorecer a interoperabilidade e reducir a dependencia dun único provedor tecnolóxico.
O catálogo inclúe, ademais, un espazo para compartir coñecemento e datos entre concellos e empresas, así como un sistema de autoxestión dixital de espazos educativos e culturais. Esta ferramenta permite reservar aulas, zonas de traballo compartido e estudos de ensaio, ademais de facilitar o acceso mediante o teléfono móbil.
Estas solucións contribúen a reducir os trámites administrativos, mellorar o aproveitamento das instalacións e ofrecer unha maior flexibilidade nos horarios de uso.
Coa elaboración deste catálogo, Conectivi.gal reúne exemplos de aplicación práctica das tecnoloxías de conectividade en distintos servizos públicos, co propósito de facilitar ás administracións o coñecemento de ferramentas que poden contribuír á modernización da xestión e á mellora da atención á cidadanía.
