O teatro, a presentación dun libro, as festas de San Martiño de Porto e a tradicional Roga da Esfolla protagonizan a axenda dos próximos días. Ademais, o Concello informa da nova localización do Punto Limpo móbil e do cambio de data dunha excursión.
O Concello de Cabanas presenta unha axenda cargada de propostas culturais, festivas e sociais para esta semana, con actividades para diferentes públicos e iniciativas pensadas para fomentar a participación da veciñanza.
Teatro e presentación literaria
A programación arrinca o xoves 5, ás 12:30 horas, coa representación teatral de Travesía unicornio no CEIP Eladia Mariño. A actividade está organizada polo Concello de Cabanas e a Deputación da Coruña, no marco do Circuíto en Igualdade da institución provincial.
O venres 6, ás 20:00 horas, a Casa da Cultura acollerá a presentación do libro Usted debería saber. La historia secuestrada de la monarquía. 90 años con Franco, do autor Manuel Monge, organizada por Tarde Piache. De maneira paralela, desenvolverase un obradoiro de camisolas dirixido a nenos e nenas, que funcionará como servizo de conciliación.
San Martiño de Porto celebra as súas festas
As celebracións de San Martiño de Porto comezarán o venres 6, ás 21:00 horas, cunha proposta gastronómica que contará con polbo da Pulpería Landeira. A continuación, a verbena estará amenizada polo Grupo Eureka e o Dúo Venus.
O sábado 7 continuará a festa coas tradicionais dianas e alboradas a cargo de gaiteiros. Ás 13:15 horas celebrarase a misa solemne, seguida dos fogos de artificio e da sesión vermú co Dúo Maracuyá. Pola noite, a música volverá ser protagonista coa verbena do Grupo Jaque e o Dúo Maracuyá.
A programación relixiosa e festiva pecharase o domingo 8, ás 13:15 horas, coa misa solemne e a procesión do Santo Patrón. A continuación, haberá sesión vermú co Dúo Boreal.
A Roga da Esfolla, protagonista do domingo
A tarde do domingo 8 estará dedicada á tradición coa celebración da Roga da Esfolla, prevista para as 17:00 horas no Pavillón de Lavandeira.
A actividade está organizada coa colaboración da Asociación de Mulleres Cabanas Rural e contará coa música de Silbarda e unha merenda con liscos, nunha cita que busca manter vivas as tradicións populares e favorecer o encontro entre veciños e veciñas.
Nova ubicación para o Punto Limpo móbil
O Concello tamén informa de que o Punto Limpo móbil estará esta semana na avenida do Areal, concretamente no aparcadoiro do Día Oito. A veciñanza poderá acudir a esta nova localización para facer uso deste servizo municipal.
Cambios na excursión e próxima visita da ITV Agrícola
Por outra banda, a excursión ao programa En compañía de Loli cambia de data por causas alleas á organización. A saída pasa a celebrarse o xoves 12.
Ademais, Cabanas prepara a próxima visita da ITV Agrícola, prevista para os días 3 e 9 de decembro no Pavillón Municipal de Lavandeira. O servizo estará dispoñible de 9:00 a 13:30 horas e de 15:15 a 18:00 horas.
As persoas interesadas xa poden solicitar cita previa no teléfono 981 92 80 80 ou a través da páxina web www.sycitv.com.
Con esta programación, Cabanas combina cultura, música, tradición e servizos públicos nunha semana con alternativas para diferentes idades e intereses.
