A cidade prepárase para vivir unha nova edición de Noites do Porto, o festival que converterá a fachada marítima coruñesa nun gran escenario urbano entre o 23 de setembro e o 2 de outubro. A presentación do cartel, celebrada hoxe en Ummagumma, contou coa participación do concelleiro de Cultura e Turismo, Gonzalo Castro, quen destacou «a capacidade do evento para proxectar A Coruña como capital cultural e como referente de creación artística, tanto musical como plástica».
O programa incorpora como gran novidade a actuación de La Casa Azul, que celebrará o seu 25º aniversario cun concerto exclusivo en Galicia o 27 de setembro no Muelle da Batería, nunha noite na que tamén se renderá homenaxe ao Bristol Bar, polo seu 30º aniversario como referente da música independente. A xornada abrirase cunha sesión especial de DJ a cargo de Juligan, alter ego de Julián Saldarriaga, integrante de Love of Lesbian, que suma así prestixio e singularidade á programación.
A cita consolídase así como un escaparate de talento local, nacional e internacional, cun cartel no que figuran tamén nomes como The Lemonheads (xa con entradas esgotadas), Ana Curra e Ilegales, Israel Fernández, Deadletter (que terá como teloneiros aos vigueses Fantasmage), Yazz Ahmed, Jasmine Myra, Sho-Hai, Michelle David & The True-Tones ou The Gruesomes. Da escena coruñesa e galega estarán presentes Moura e Océano Eskizo.
Música e artes plásticas: un encontro de escenas
Noites do Porto reforza o seu carácter multidisciplinar coa cápsula Noites coa Arte, que reúne a creación de destacados nomes da plástica coruñesa como Álvaro Dorda, Héctor Francesch, Javier de la Rosa, Jorge Taboada, Julia Lago, Laura Bergantiños, Manuel Suárez, Mich Martial e Vítor Mejuto, encargados de reinterpretar os carteis de cada xornada. O cartel xeral da quinta edición leva a sinatura da artista coruñesa Iria do Castelo, cuxas obras, xunto ás do resto, poden visitarse en Ummagumma ata o 5 de outubro.
O festival amplía ademais a súa presenza nos espazos urbanos coa cápsula Noites nos Bares, que achegará ás salas e locais de referencia da cidade sesións especiais de DJs e selectores locais, nacionais e internacionais, entre eles Callum Brown, Ryan Scott, Vanne Vamp, Ángel Snap, Txetxu el Tigre, Gulya ou Los Bundy.
Apoio institucional
A quinta edición de Noites do Porto é posible grazas ao compromiso do Concello da Coruña, patrocinador principal do evento, que sitúa así á cidade como un referente cultural aberto, diverso e próximo á cidadanía. Este respaldo enmárcase na aposta do Goberno de Inés Rey por promover unha programación cultural ambiciosa, sostida no apoio ás creadoras e creadores locais e na proxección internacional da cidade.
O festival está organizado e producido por MASGALICIA, e conta tamén coa colaboración da Xunta de Galicia, a través da Axencia Turismo de Galicia no marco da iniciativa Concertos do Xacobeo, da Deputación da Coruña e da Autoridade Portuaria. A estes apoios súmanse o patrocinio de Estrella Galicia e a participación de entidades culturais e creativas como Fnac, Güres, Coruña Gráfica ou o Cormorán Film Fest, que reforzan a súa conexión co ecosistema local.
Tamén medios como SER Radio Coruña e Mondo Sonoro contribúen á difusión do festival, mentres que as entradas se xestionan a través das plataformas Ataquilla e Ticketmaster, garantindo o acceso do público ás diferentes propostas.
O festival reafírmase como unha das grandes citas culturais do outono na cidade, cunha programación que abrangue estilos como o rock, punk, grunge, hip-hop, jazz, flamenco, soul, indie pop ou garage, e que, en palabras do concelleiro Castro, «achega á cidadanía unha experiencia única, vinculando o porto e os espazos culturais da Coruña co mellor da música e da creación contemporánea».
