Activouse un amplo operativo de busca por terra, mar e aire para localizar un pescador deportivo desaparecido nas inmediacións do Monte de San Pedro, na cidade da Coruña.
Segundo a información dispoñible, o primeiro aviso recibiuse a través do 112 ás 08:41 horas de hoxe, tras a chamada dun particular que indicou que o pescador saíra a pescar arredor das 19:00 horas de onte, luns, e non regresara ao seu domicilio.
Ante esta situación, despregouse un importante dispositivo de emerxencia. Por terra participan efectivos dos 🧑🚒 Bombeiros da Coruña, 👮♂️ a Policía Local, 👮♂️ a Policía Nacional e a AVPC da Coruña 🔶️. Polo aire participa o helicóptero Helimer e polo mar o buque de Salvamento Marítimo Salvamar Betelgeuse.
Polo momento, a busca continúa sen resultados positivos. As condicións do mar son adversas, con ondas de ata 4 metros, o que dificulta os labores. Non se descarta ampliar a zona de busca cara á Torre de Hércules e Riazor, debido ás correntes e ás mareas.
Desde primeira hora da mañá, o operativo céntrase especialmente entre o Porto Exterior e a zona de San Pedro de Visma, mantendo o despregue activo á espera de novidades.
