Esclarecemento de máis de trinta delitos contra o patrimonio e recuperación dunha arma de fogo e numerosos efectos subtraídos
A Coruña, 25 de febreiro de 2026.- A Garda Civil, no marco da operación CURRELOS, procedeu á detención de dous varóns de 41 e 33 anos, veciños de A Laracha e Arteixo, como presuntos autores dunha trintena de delitos contra o patrimonio. A investigación foi desenvolvida polo Equipo ROCA da Compañía de Santiago de Compostela, en colaboración coa Policía Local de Cerceda e a Garda Civil de Santiago.
As investigacións iniciáronse tras detectarse un incremento de roubos con forza en instalacións municipais na localidade de Cerceda. A raíz destes feitos, e mediante a análise das evidencias obtidas, os axentes determinaron a existencia dunha metodoloxía criminal recorrente que, tras unha fase inicial centrada en dependencias públicas, se desprazou cara ao ámbito privado, con especial incidencia en garaxes e rochos de comunidades residenciais.
Así mesmo, no transcurso das pescudas, púidose constatar que os implicados actuaban de maneira coordinada utilizando un inmoble na localidade da Laracha como base loxística para o almacenamento dos efectos subtraídos. O ámbito de actuación do grupo abranguía de forma itinerante os municipios de Cerceda, Oleiros, Culleredo, Cambre, Carral e Arteixo.
A fase de explotación do operativo materializouse durante a madrugada do pasado 19 de febreiro no casco urbano de Cerceda, onde un dispositivo de vixilancia permitiu localizar os sospeitosos en pleno acto delituoso. Tras a súa interceptación, constatouse ademais que o condutor carecía de permiso habilitante e presentaba indicios compatibles co consumo de substancias estupefacientes.
Posteriormente, baixo o correspondente mandamento xudicial, practicouse un rexistro no domicilio utilizado polo grupo na Laracha, onde os axentes lograron recuperar os seguintes efectos:
- Un revólver do calibre .36 (sen número de serie e en avanzado estado de oxidación).
- Varias ballestas e carabinas de aire comprimido.
- Unha importante cantidade de material relacionado cos roubos perpetrados: ferramentas, enseres e obxectos de diversa índole.
O Tribunal de Instancia, Sección Civil e de Instrución, Praza 3 da Coruña, decretou o ingreso en prisión para os dous detidos, aos que se lles imputan presuntos delitos de roubo con forza, tenza ilícita de armas e atentado contra a Autoridade e a seguridade viaria. Ambos presentaban, ademais, requisitorias xudiciais previas e un amplo historial de antecedentes por feitos de similar natureza.
