Os nacionalistas rexistran unha moción na que solicitan á corporación municipal que se pronuncie a favor do cadro de persoal na defensa dun convenio colectivo digno que garanta o mantemento do poder adquisitivo
Dumbría, 6 de marzo de 2026. O BNG de Dumbría vén de rexistrar unha moción no Concello na que solicita á corporación municipal que amose o apoio institucional ás reivindicacións do cadro de persoal de Xeal, en defensa dun convenio colectivo digno que garanta o mantemento do poder adquisitivo e unhas condicións laborais xustas. Na iniciativa, que será debatida no vindeiro pleno ordinario, a formación nacionalista insta á dirección da empresa “a desbloquear de maneira inmediata a negociación colectiva, actuando con boa fe, con responsabilidade social e vontade real de acordo”.
Así mesmo, o BNG pide á corporación dumbriesa que aposte polo emprego industrial na comarca, garantindo a vinculación efectiva entre a explotación hidroeléctrica e a actividade produtiva e o mantemento dos postos de traballo. E ademais insta á Xunta de Galiza a exercer as súas competencias “para velar polo cumprimento das condicións da concesión e polo interese público, asegurando que os recursos naturais da comarca revertan en emprego e desenvolvemento económico”.
O portavoz municipal do BNG, Xaime Trillo, afirmou que “a nosa intención era debater a moción na sesión plenaria celebrada este xoves 5 de marzo, e por iso presentámola pola vía de urxencia, pero lamentablemente a maioría dos edís votaron en contra de que a iniciativa fose tratada no pleno; cuestión que criticamos, pois cremos que se trata dunha cuestión que está candente nestes momentos, e o Concello de Dumbría, como administración máis próximas á veciñanza, non pode permanecer alleo a un conflito que afecta directamente ao emprego, á economía local e á cohesión social do territorio”.
O voceiro nacionalista engadiu que “na actualidade a negociación do convenio colectivo leva máis dun ano sen avances significativos, nun contexto marcado pola perda continuada de poder adquisitivo das persoas traballadoras, a deterioración das condicións laborais e a perda de máis de 80 postos de traballo nos últimos anos”.
Mocións sobre o agro e a pesca
Xaime Trillo sinalou ademais que a corporación non apoiou no pleno de onte dúas mocións do BNG. Unha relativa á defensa do sector gandeiro e de rexeitamento ao acordo comercial UE-Mercosur, e outra de apoio á frota galega de pesca artesanal ante o regulamento de control impulsado pola Unión Europea.
O portavoz nacionalista subliñou que “lamentamos maiormente que PP e PSOE non votasen a favor da moción sobre o acordo da UE con Mercosur, dada a importancia do sector agropecuario en Dumbría”.
