O Concello de Corcubión levou a cabo ao longo do pasado mes de marzo diversas actuacións orientadas á mellora dos espazos públicos e dos servizos municipais. Entre os traballos realizados destacan labores de limpeza, desbroce de zonas verdes e a instalación de novos elementos de seguridade.
No ámbito das infraestruturas, instaláronse novas barandas nos accesos ao Centro de Saúde e na Casa da Cultura Plácido Castro, co obxectivo de garantir unha maior seguridade e accesibilidade para a veciñanza.
Ademais, habilitáronse dous aparcamentos reservados nas proximidades do Centro Médico, facilitando así o acceso ás persoas usuarias deste servizo esencial.
Por outra banda, desenvolvéronse tarefas de desbroce e poda en distintas zonas verdes do municipio, contribuíndo á mellora da imaxe e ao mantemento dos espazos naturais da vila.
Desde o Concello sinalan que estas actuacións forman parte do compromiso continuo coa mellora da calidade de vida da cidadanía e co coidado do entorno urbano.
Acompañando estas intervencións, preséntase unha pequena reportaxe fotográfica que recolle os traballos realizados e os resultados acadados.
