O xacemento do Castro das Barreiras continúa a ser protagonista dun dos proxectos arqueolóxicos máis relevantes da comarca. A alcaldesa de Vimianzo, Mónica Rodríguez Ordóñez, xunto co arqueólogo responsable da escavación, Tito Conxeiro, presentaron os primeiros resultados da campaña 2026, na que xa se documentaron descubrimentos de gran interese histórico e científico.
Entre os achados máis destacados figura a aparición dun betilo, unha peza de forte simbolismo asociada a prácticas relixiosas ou rituais de épocas antigas, así como unha abundante colección de material arqueolóxico que permitirá afondar no coñecemento da vida no xacemento.
Segundo explicaron os responsables do proxecto, estes avances confirman a importancia do enclave e reforzan o seu potencial como espazo clave para a investigación e a divulgación do pasado castrexo na zona.
O Concello de Vimianzo mantén así a súa aposta pola posta en valor do patrimonio local, coa mirada posta en converter As Barreiras nun referente do turismo arqueolóxico no corazón da Costa da Morte. A intervención continúa avanzando de forma progresiva, co obxectivo de seguir desvelando novos datos sobre a historia deste asentamento.
Pasiño a pasiño, o Castro das Barreiras vai recuperando a súa memoria, consolidándose como un espazo de referencia para a cultura e o patrimonio da contorna.
