A folga de Educación notouse máis nos institutos, aínda que tivo unha incidencia baixa na Costa da Morte. A primeira xornada do paro no ensino tivo maior seguimento nos institutos da comarca, pero sen chegar a ser significativo. Nalgúns centros, como o instituto Fernando Blanco, ningún docente secundou a folga, mentres que noutros a participación limitouse a pequenos grupos de entre cinco e quince profesores, o que supón entre un 10 e un 20 % do cadro de persoal. Esta escasa adhesión fixo que a xornada transcorrese con relativa normalidade.
O apoio ao paro convocado para hoxe aínda se descoñece, xa que varios docentes manifestaron a súa intención de sumarse só a unha das dúas xornadas de folga previstas para reclamar melloras no ensino público. Si houbo mobilizacións por parte das familias, como fixeron novamente membros da asociación de pais e nais A Granxa, do colexio Bergantiños de Carballo, que se concentraron pola mañá diante do centro.
Onde máis se deixou sentir a protesta foi no transporte escolar. A xornada máis complicada foi a do venres, cando varios centros educativos denunciaron o incumprimento dos servizos mínimos. Segundo indicaron, os pais tiveron que ir buscar os seus fillos debido a que os piquetes impediron a saída dos autobuses das cocheras. O luns tamén se rexistraron dificultades nalgúns institutos, aínda que de menor intensidade.
