A directora da Axencia Galega de Infraestruturas, María Deza, anunciou no Parlamento que as obras de prolongación da autovía da Costa da Morte non estarán finalizadas ata o primeiro semestre de 2029. A resposta produciuse durante unha intervención motivada por unha pregunta do BNG.
Deza explicou que o novo treito previsto, de 5,5 quilómetros entre Santa Irena e Vimianzo, manterá o deseño de corredor, igual que o tramo entre Baio e Santa Irena. Argumentou que o volume de tráfico actual non chega aos 10.000 vehículos diarios necesarios para xustificar unha autovía, cunha media de 6.000 vehículos/día entre Carballo e Baio e pouco máis de 5.000 no último tramo ata Santa Irena. Sobre o financiamento, asegurou que existe «crédito máis que suficiente» para licitar unhas obras valoradas en máis de 36 millóns de euros.
A responsable de Infraestruturas adiantou tamén que a Xunta prevé continuar a vía ata Berdoias (Vimianzo) e que «a principios de 2026» se licitará a redacción do proxecto correspondente.
Pola súa banda, o deputado do BNG, Óscar Insua, cualificou de «aldraxe á Costa da Morte» que o primeiro tramo non estea rematado antes de 2029. Afirmou que os datos de tráfico son similares aos utilizados pola Xunta para xustificar a finalización doutras autovías, como a da Estrada. Ademais, criticou que a prolongación levase paralizada desde 2020 e que o proxecto actual non inclúa o enlace co polígono de Vimianzo, decisión que atribuíu ao feito de que a Xunta queira que sexan os empresarios quen reclamen esta infraestrutura, algo que considerou «un despropósito».
