Veciños de Suevos, no concello de Arteixo, denuncian unha grave situación medioambiental provocada por vertidos continuados de augas fecais que levan anos producíndose sen unha solución efectiva. As imaxes e vídeos achegados pola Plataforma de Defensa da Natureza e da Calidade Ambiental de Arteixo mostran claramente a presenza de toalliñas e outros residuos propios de sumidoiros, así como un forte cheiro perceptible a grandes distancias.
Segundo relatan os afectados, as augas residuais discorren pola estrada DP-3002 ao seu paso polo pobo de Suevos e tamén pola CP-0503, vía que comunica Suevos con Bens. Todos estes vertidos acaban desembocando no mar, chegando directamente ás praias da zona, o que supón un grave risco para o ecosistema mariño e para a saúde pública.
A pesar de que esta problemática se vén repetindo desde hai anos, a resposta das autoridades segue sendo insuficiente. No día de onte déronse avisos á Garda Civil, Policía Local, Gardacostas e ao 112, acudindo unicamente axentes da Garda Civil de Arteixo para comprobar a situación.
Membros da plataforma veciñal PDNC Arteixo procederon á recollida dunha mostra das augas contaminadas co obxectivo de sometela a análise e presentala posteriormente no concello. Dende a plataforma denuncian que este é só un exemplo das múltiples problemáticas ambientais que afectan ao municipio e que permanecen descoñecidas para gran parte da cidadanía.
As probas visuais xa están sobre a mesa; o cheiro e as consecuencias directas seguen a padecelas os veciños.
