Un home veciño de Camariñas atópase en estado grave tras sufrir unha brutal malleira en plena vía pública, presuntamente relacionada cunha débeda duns 20.000 euros. Os feitos tiveron lugar na tarde do pasado domingo nunha rúa principal da Ponte do Porto.
Segundo as primeiras informacións, a vítima camiñaba acompañada de dúas mulleres, unha delas a súa actual parella sentimental, cando apareceron dous vehículos que se cruzaron na vía. De maneira repentina, entre dous e tres homes baixaron dos coches e, sen mediar palabra, abalanzáronse sobre el, golpeándoo con patadas e puñazos por todo o corpo. Tras consumar a agresión, os atacantes fuxiron a gran velocidade nos mesmos vehículos.
O ferido rexeitou inicialmente a asistencia sanitaria, aínda que finalmente accedeu a ser trasladado a un centro hospitalario debido á gravidade das lesións. Polo momento, non consta a presentación de ningunha denuncia ante a Garda Civil en relación con estes feitos.
No que respecta ás causas da agresión, as primeiras hipóteses apuntan a un posible axuste de contas relacionado co tráfico de substancias estupefacientes. Todo indica que a vítima acumulaba unha débeda próxima aos 20.000 euros con presuntos provedores de droga. De feito, apenas se deixaba ver por Camariñas desde había uns dous meses, coincidindo, presuntamente, co inicio das ameazas por estes impagos.
Estes feitos produciron o mesmo fin de semana no que tamén se rexistrou unha pelexa no centro de Carballo, na que estiveron implicadas cinco persoas e cuxas imaxes se difundiron amplamente a través das redes sociais.
