O piloto galego Fran Gómez Pallás proclamouse vencedor do Dakar Mission 1000 na categoría de motos eléctricas, acadando un triunfo histórico que chega un ano despois da dura caída sufrida a escasos metros da meta na pasada edición.
Tras aquel amargo episodio, Gómez Pallás regresou ao Dakar con máis forza, determinación e experiencia. Nesta edición, o seu esforzo tivo recompensa ao subir ao máis alto do podio, facendo ondear con orgullo a bandeira de España e a de Galicia nunha das competicións máis esixentes do mundo do motor.
Segundo trasladou o propio piloto tras conversas directas, Fran quixo agradecer publicamente todo o apoio recibido, especialmente o mostrado a través das redes sociais e das votacións, que resultaron fundamentais para o equipo ao longo da competición.
Do mesmo xeito, o piloto galego tivo palabras de recoñecemento para o creador de contido ChampiMuros, destacando a súa axuda desinteresada durante a votación de equipos, un apoio clave no camiño cara á vitoria final.
Con este triunfo, Fran Gómez Pallás non só culmina unha historia de superación persoal, senón que tamén consolida a súa figura como referente do motociclismo eléctrico e do deporte galego no ámbito internacional.
