O acto, enmarcado no 8-M, foi organizado pola Acción Feminista do BNG comarcal e tivo lugar este sábado 14 de marzo en Muxía
Costa da Morte, 14 marzo de 2026. A Acción Feminista do BNG da Costa da Morte rendeu homenaxe este sábado 14 de marzo en Muxía ás mulleres das ANPA’s da comarca, en recoñecemento á súa loita por demandar melloras nos centros escolares, especialmente neste curso no que veñen participado en mobilizacións para reclamar máis docentes para o alumnado con necesidades especiais.
O acto, enmarcado na celebración do 8-M, foi presentado pola voceira municipal do BNG de Muxía, Mercé Barrientos, e foi pechado pola deputada de Igualdade da Deputación da Coruña, Sol Agra. Foron invitadas representantes das ANPA’s dos concellos de Fisterra, Corcubión, Cee, Carnota, Dumbría, Muxía, Vimianzo, Camariñas e Zas, que recibiron un agasallo por parte das organizadoras.
Entre o numeroso público asistente estiveron o deputado do BNG Oscar Insua; os alcaldes de Zas e Muxía, Manuel Muíño e Javier Sar; e membros do BNG das diferentes localidades da comarca.
A Acción Feminista do BNG sinalou que “neste curso 2025-2026 toda a comarca vén de sufrir recortes importantes en educación, e a defensa do ensino público por parte das ANPAS, constituídas maioritariamente por mulleres, fai que sexan merecedoras dun recoñecemento especial”.
O evento contou coa actuación musical das mozas pandeireteiras “Os Roquiños”, e ao remate o público asistente puido degustar duns petiscos.
