A decisión de Alfonso Rueda de dar carpetazo ao proxecto de Altri en Palas de Rei non debe enganarnos: non estamos ante unha rectificación política do Partido Popular de Galicia, senón ante unha retirada obrigada polas circunstancias técnicas e pola presión social.
Durante meses, o Goberno galego vendeu o proxecto como unha oportunidade histórica para Galicia, ocultando deliberadamente que a planta estaba orientada principalmente á produción de pasta de papel. Non houbo unha planificación industrial seria nin unha análise transparente do impacto territorial. Houbo, máis ben, unha aposta política precipitada por un macroproxecto alleo ao tecido produtivo galego.
O máis preocupante é que Alfonso Rueda insiste en que o problema foi a falta de conexión eléctrica e non o modelo industrial en si. Isto revela que o PPdeG non cambiou de enfoque: simplemente perdeu esta operación concreta. A porta queda aberta a repetir o mesmo esquema no futuro.
Galicia merece algo mellor que vivir pendente de decisións de multinacionais. Precisa unha política industrial propia, pensada desde o territorio e ao servizo do país. Non se trata de dicir non á industria, senón de dicir si a unha industria que xere valor engadido aquí, que respecte o medio e que fortaleza a nosa economía produtiva.
Desde Espazo Común Galeguísta defendemos un cambio de rumbo claro: planificación estratéxica galega, transparencia total e prioridade ás cadeas de valor propias. Porque o verdadeiro debate non é Altri si ou non; é que modelo industrial queremos para Galicia nas próximas décadas.
JAVIER GONZÁLEZ
Secretario de Organización de Espazo Común Galeguista
