Varios estudantes de Bacharelato do IES Agra de Leborís, na Laracha, manifestaron o seu malestar pola decisión da dirección do centro de prohibir saír ás rúas próximas durante os recreos e tempos libres. Segundo o alumnado, esta medida responde a que “moitos ían mercar ao Gadis ou a outros establecementos da zona, onde os prezos son máis baratos ca na cafetería do instituto”.
Fontes do alumnado consideran “vergoñento” que se limite a súa liberdade de movemento por razóns económicas. “Non é unha cuestión de comportamento, senón de dereitos. Somos estudantes de Bacharelato, moitos xa maiores de idade, e deberiamos poder elixir onde mercar”, aseguran.
A dirección do IES Agra de Leborís non se pronunciou oficialmente sobre a medida, aínda que fontes do propio centro sinalan que as restricións responden a cuestións organizativas e de seguridade, non a motivos comerciais.
A situación xerou debate entre o alumnado, as familias e parte do profesorado, que consideran necesario revisar as normas internas do centro para garantir tanto a seguridade como os dereitos do estudantado. Non se descarta que o tema sexa levado ao Consello Escolar ou mesmo á Inspección Educativa da Xunta de Galicia, se non se chega a un acordo nas próximas semanas.
