Isto está a pasar na carretera da Tremoa, xunto ao cruce que vai para Brión, na parroquia de Leiloio.
Na beira da estrada hai uns eucaliptos que invaden claramente a zona de paso dos vehículos, poñendo en risco a seguridade vial cada día. Non estamos falando dunha molestia menor: xa houbo autobuses que, ao apartarse para cruzarse cun coche, acabaron golpeando cos espellos nas árbores.
E a pregunta é moi simple: que está esperando o goberno do PP de Malpica para actuar?
Porque isto non é novo, nin se advertiu unha soa vez. Levo varios plenos reclamando que se tomen medidas, que se requira ao propietario da finca ou que actúe directamente o Concello se é preciso, porque a situación é perigosa e pode acabar nun accidente grave.
A resposta do goberno municipal foi a de sempre: deixar pasar o tempo, mirar para outro lado e non facer nada.
Hai xa cinco meses dixéronme que “o mirarían” e que esa parcela mesmo podía ser do propio Concello de Malpica, aínda que despois puxeron en dúbida esa información.
Pois ben: se nin sequera saben de quen é a finca, a desorganización é grave; e se o saben e non actúan, a irresponsabilidade é aínda maior.
O problema aquí non é a titularidade da parcela.
O problema é que hai un risco evidente para os vehículos que pasan por esa curva, especialmente para autobuses e vehículos grandes, e o goberno municipal leva meses sen resolver algo que xa debería estar solucionado.
Non se pode esperar a que haxa un accidente serio para facer o que había que facer hai meses.
En Malpica xa estamos afeitos á política da deixadez, da improvisación e da falta de prevención por parte do PP, pero coa seguridade viaria non se xoga.
Que deixen as escusas e actúen dunha vez. Antes de que sexa tarde.
