Tres persoas resultaron feridas, unha delas en estado grave, tras un accidente de tráfico rexistrado este sábado pola tarde na estrada autonómica AC-419, que une Ponteceso con Carballo a través de Buño.
O sinistro produciuse ao seu paso pola parroquia de Tella, nas proximidades do polígono industrial de Ponteceso, e consistiu nun choque frontal entre dous vehículos ocorrido arredor das 14:30 horas, segundo indicaron os servizos de emerxencias.
Ata o lugar desprazáronse efectivos de Tráfico da Guardia Civil, o GES de Ponteceso, Urxencias Sanitarias e membros de Protección Civil para atender ás persoas feridas e regular a circulación.
