O temporal de chuvia e vento provocou un accidente de tráfico no lugar de Feixe, pertencente á parroquia carballesa de Noicela. O sinistro produciuse na xornada do luns nas inmediacións da estrada que conduce á praia de Baldaio, no entorno do vial que comunica Carballo con Caión.
O turismo implicado resultou coa parte frontal completamente destrozada como consecuencia do impacto contra a árbore, que fora derrubada polas fortes rachas de vento rexistradas na zona.
Ata o lugar dos feitos desprazouse unha patrulla da Garda Civil de Tráfico para atender o accidente e regular a circulación.
Durante a noite do domingo e ao longo de toda a xornada do luns, as rachas de vento en distintos puntos da Costa da Morte foron moi intensas, acadando os 138 quilómetros por hora en Vimianzo e superando os 101 quilómetros por hora en Camariñas.
