Unha persoa tivo que ser evacuada na madrugada deste domingo tras sufrir unha intoxicación por gas nunha vivenda situada no lugar de Filgueira, na parroquia de Cerqueda, no concello de Malpica. Segundo informou o 112 Galicia, o suceso produciuse pouco despois da 01:00 horas e estivo aparentemente provocado pola mala combustión dun calefactor.
A alerta foi dada por unha persoa que indicou aos servizos de emerxencias que o afectado se atopaba indisposto e caera ao chan, e que posiblemente non podía abrir a porta do domicilio, feito que finalmente se confirmou. Os equipos de emerxencia lograron acceder á vivenda para atender á vítima.
Unha vez asistida no interior do inmoble, a persoa afectada foi trasladada en ambulancia a un centro sanitario. No operativo participaron os bombeiros de Carballo, o GES de Ponteceso, a Garda Civil e a Agrupación de Voluntarios de Protección Civil de Malpica.
Os servizos de emerxencias indicaron que na estancia había unha acumulación de gas, que todo apunta a que procedía dunha mala combustión do calefactor, o que provocou a intoxicación.
