Axentes do Equipo ROCA da Garda Civil de Carballo, en colaboración cos postos de Vimianzo e Camariñas, detiveron un veciño de 63 anos como presunto responsable de tres delitos contra o patrimonio cometidos en distintos establecementos da Costa da Morte.
Segundo informou a Benemérita, ao arrestado atribúenselle un roubo con forza e dous roubos con violencia e intimidación perpetrados nas localidades de Ponte do Porto e Vimianzo. A actuación policial púxose en marcha tras as denuncias presentadas polos responsables dos negocios afectados, activándose un dispositivo de investigación e seguridade cidadá para identificar e localizar o sospeitoso.
O primeiro dos feitos tivo lugar o pasado 20 de maio nun establecemento hostaleiro de Ponte do Porto, no municipio de Camariñas. O presunto autor accedeu ao local tras forzar a porta principal e levou varias botellas de bebidas alcohólicas, ademais de arredor de 500 euros en efectivo.
Días despois, o 30 de maio, produciuse unha nova vaga delituosa en Vimianzo. Sobre as oito da tarde, o investigado entrou nun comercio de alimentación coa cara oculta por un pasamontañas e armado cun coitelo, co que ameazou aos presentes para facerse coa recadación da caixa.
Apenas media hora máis tarde, o mesmo individuo protagonizou un segundo asalto nunha farmacia da localidade, empregando novamente un coitelo para intimidar ao persoal. Nesta ocasión conseguiu subtraer uns 400 euros en metálico.
A investigación permitiu identificar ao presunto autor, que foi finalmente localizado e detido o pasado 2 de xuño na parroquia de Camelle, pertencente ao concello de Camariñas.
Unha vez instruídas as correspondentes dilixencias, o detido foi posto a disposición do Xulgado de Garda de Corcubión. A Garda Civil considera esclarecidos os tres roubos denunciados e dá por finalizado o operativo desenvolvido na comarca.
