A indignación continúa medrando entre os veciños dunha zona de Cee afectada por unhas obras que, segundo denuncian, están a provocar importantes molestias sen que exista unha comunicación clara por parte do Concello.
Os residentes critican que non recibiron ningún aviso previo sobre o inicio dos traballos nin sobre as consecuencias que estes terían no seu día a día. Entre as incidencias máis denunciadas figuran os cortes de auga, as restricións ao tráfico e as dificultades de acceso ás vivendas.
«Desde o Concello non recibimos ningún aviso. Ninguén se dignou a informarnos de nada», lamentan varios afectados, que aseguran vivir nunha situación de incerteza permanente desde que comezaron as actuacións.
Segundo explican, a alcaldesa desprazouse en dúas ocasións á zona tras ser requirida polos propios veciños e resolveu algunhas queixas puntuais. Porén, consideran insuficiente esta intervención e reclaman unha maior implicación do goberno local.
Os afectados denuncian a ausencia dunha persoa responsable que coordine as obras, atenda as reclamacións e manteña informada á veciñanza sobre o desenvolvemento dos traballos. «Non hai unha cabeza pensante no Concello que se ocupe das obras, dea a cara e sexa capaz de comunicarse cos veciños», sinalan.
A falta de información e de resposta institucional está a aumentar o malestar entre os residentes, que cualifican de «ofensivo» o silencio mantido ata o momento polo Concello. «Parece que lles importamos ben pouco», conclúen os veciños, que esixen máis transparencia e unha canle de comunicación efectiva mentres duren as obras.