Un mozo de 20 anos resultou ferido este luns tras verse implicado nunha colisión entre unha motocicleta e un camión no municipio de Abegondo.
Ata o lugar do accidente desprazáronse efectivos dos Bombeiros de Betanzos, persoal sanitario do 061 e axentes da Garda Civil de Tráfico, que atenderon a emerxencia e regularon a circulación na zona.
Como consecuencia do impacto, o motorista tivo que ser evacuado de urxencia ao Complexo Hospitalario Universitario da Coruña (CHUAC), onde recibirá asistencia médica.
Polo momento non transcenderon máis detalles sobre as circunstancias nas que se produciu o sinistro, que están a ser investigadas pola Garda Civil de Tráfico.
