O Campo Municipal do Pinguel, no Concello de Ponteceso (A Coruña), acolleu hoxe o Trofeo Federación de Aire Libre, correspondente á 5ª Liga Galega de Aire Libre da tempada 2025/26. A xornada estivo marcada polas elevadas temperaturas, que obrigaron a suspender o III Trofeo Costa da Morte, previsto para a tarde, debido ás alertas vermellas por calor.
A pesar das duras condicións meteorolóxicas, cinco arqueiros e arqueiras do Club Lumelar desprazáronse ata Ponteceso para competir e demostrar o seu compromiso co deporte. Participaron Fátima Solaz, en arco recurvo sub-21 feminino; Carlos Doval, en arco composto +50 masculino; e Marcos Rodríguez, David Pozo e Claus Seara, en arco recurvo absoluto masculino.
O esforzo tivo unha excelente recompensa, xa que o club regresou cun balance de tres medallas e un cuarto posto, un resultado moi destacado tendo en conta o número de participantes e as extremas condicións da competición.
Os resultados foron os seguintes:
- 🥇 Marcos Rodríguez, campión en arco recurvo absoluto masculino.
- 🥈 Carlos Doval, subcampión en arco composto +50 masculino.
- 🥉 Fátima Solaz, terceira clasificada en arco recurvo sub-21 feminino.
- David Pozo, cuarto clasificado en arco recurvo absoluto masculino.
- Claus Seara, duodécimo clasificado en arco recurvo absoluto masculino.
Con esta competición remata a tempada oficial en Galicia. Agora, os deportistas do club que participarán nos Campionatos de España afrontan un intenso mes de preparación para chegar nas mellores condicións á cita estatal.
Dende o Club Lumelar queremos felicitar a todos os participantes polo seu esforzo e compromiso, especialmente nunha xornada marcada polo intenso calor, e desexarlles moita sorte aos arqueiros e arqueiras que representarán o club nos vindeiros Campionatos de España.
Parabéns a todos e a seguir adestrando!