Coristanco. Un incendio rexistrado na tarde deste venres nunha vivenda do municipio de Coristanco derivou nunha investigación por un presunto caso de violencia de xénero e na procura dun home, ao que a Garda Civil trata de localizar como suposto autor dos feitos.
O aviso recibírono os servizos de emerxencias a través do 112 Galicia pouco despois das 15.30 horas. Segundo as primeiras informacións, unha muller alertou de que a súa parella lle prendera lume á vivenda cando ela e os seus fillos se atopaban no interior.
As lapas afectaron un sofá e unha manta, sen que se rexistrasen danos persoais. Á chegada dos equipos de emerxencias, o incendio estaba practicamente extinguido, polo que os efectivos centraron a súa intervención en asegurar a zona e comprobar o estado das persoas que se atopaban na casa.
Ata o lugar desprazáronse axentes da Garda Civil, efectivos do Grupo de Emerxencias Supramunicipal (GES) de Ponteceso, membros de Protección Civil de Coristanco e os Bombeiros de Carballo. O 112 Galicia tamén mobilizou unha ambulancia do 061 por se fose necesaria asistencia sanitaria.
Con todo, o presunto autor dos feitos xa non se atopaba na vivenda cando chegaron os primeiros efectivos. A Garda Civil activou un dispositivo de procura para tratar de localizalo e esclarecer as circunstancias nas que se produciu o incendio.
A investigación continúa aberta e, polo momento, non transcenderon máis datos sobre este presunto caso de violencia de xénero.