Nemeño (Ponteceso) xa ten todo preparado para celebrar as tradicionais Festas do Sacramento, que se desenvolverán os días 7, 8 e 9 de agosto cun amplo programa de actividades relixiosas, gastronómicas e musicais pensado para todos os públicos.
As celebracións comezarán o venres 7 de agosto coa tradicional tirada de bombas de palenque, que anunciará o inicio dos festexos. A continuación terá lugar unha gran pancetada popular, seguida das actuacións de Laura Añón, JJ Compota e Ángel Sevilla. A festa continuará ata ben entrada a noite coa Disco Móbil Impacto, amenizada por DJ Bermúdez.
O sábado 8 de agosto arrancará cun pasarrúas a cargo do grupo de gaitas O Revoltixo de Braño. Posteriormente celebrarase a misa solemne na honra da Virxe do Carme e da Virxe das Dores, seguida da procesión e cantada polo Coro de Cores. Ao mediodía, a sesión vermú contará coa música do Dúo Matices. Pola noite, a verbena estará protagonizada pola Orquestra Gran Parada e a Disco Móbil Full, coa participación de DJ Expósito e DJ Roy.
As festas rematarán o domingo 9 de agosto coa misa solemne e procesión na honra do Santísimo Sacramento, acompañadas polo grupo de gaitas O Revoltixo de Braño e o Coro de Cores. A continuación celebrarase a sesión vermú co Dúo Charada, que tamén será o encargado de poñer o broche final aos festexos durante a noite xunto ao artista Drew Korme.
Desde a organización animan á veciñanza e aos visitantes a participar nunhas festas que combinan a tradición relixiosa, a gastronomía popular e un destacado programa musical, convertendo un ano máis a Nemeño nun dos puntos de encontro do verán no concello de Ponteceso.