Noite de intensa actividade no porto de Fisterra tras o naufraxio da embarcación de baixura Papin Primero, rexistrado de madrugada nas proximidades do Centolo.
Os feitos producíronse arredor das 4.15 horas, cando a radio UHF comezou a alertar do afundimento da embarcación. De inmediato, o pesqueiro Hermanos Silva, que se atopaba na zona, dirixiuse ao lugar da emerxencia para prestar auxilio.
Á súa chegada, a tripulación do Hermanos Silva conseguiu rescatar aos dous mariñeiros do Papin Primero, que permanecían na balsa salvavidas despois de abandonar a embarcación ao comprobar que se afundía de maneira irreversible.
Os dous tripulantes foron postos a salvo sen que, nun primeiro momento, transcendesen feridas de consideración. Mentres tanto, o Papin Primero acabou indo ao fondo nas augas situadas á altura do Centolo.
O suceso mobilizou aos servizos de emerxencia marítima, que seguiron a evolución da incidencia desde o primeiro aviso recibido a través da UHF. As circunstancias que provocaron o naufraxio deberán ser agora esclarecidas.