O vehículo saíu da vía, atravesou unha zona de fincas e percorreu varios metros polo aire antes de caer sobre a cuberta dunha vivenda
Dúas persoas resultaron feridas despois de que o vehículo no que viaxaban acabase sobre o tellado dun alpendre situado nunha vivenda de Arteixo. O accidente produciuse pasados uns minutos da medianoite, á altura do quilómetro 4 da estrada DP-0513.
Un particular alertou o 112 Galicia ao comprobar que un coche terminara enriba do tellado do alpendre. Os dous ocupantes do vehículo xa se atopaban fóra do turismo no momento da chegada dos servizos de emerxencia, aínda que precisaban asistencia sanitaria.
Ata o lugar desprazáronse efectivos de Urxencias Sanitarias de Galicia-061, da Garda Civil de Tráfico, dos Bombeiros de Carballo, do Servizo Municipal de Protección Civil de Arteixo e voluntarios de Protección Civil da Laracha. Tamén interviñeron os servizos encargados do mantemento da estrada.
Segundo informaron os servizos de emerxencia, o turismo saíu da vía e atravesou unha zona de fincas. Posteriormente, percorreu varios metros polo aire ata acabar impactando contra o tellado do alpendre.
Os efectivos desprazados ao lugar estabilizaron o vehículo e realizaron os traballos necesarios para preparar a súa retirada da cuberta.
