Os residentes aseguran que levan tempo reclamando a retirada de dous pivotes instalados xunto á parede do antigo Bar Óscar e denuncian tamén problemas de salubridade cos colectores do lixo
Os veciños do Rueiro do Campo, en Malpica, queren facer pública a situación que, segundo explican, levan tempo padecendo na zona e que consideran que se converteu nunha auténtica “burla” por parte das administracións.
Un dos principais problemas que denuncian está relacionado co aparcamento. Segundo os residentes, no mes de xuño o Concello de Malpica instalou dous pivotes pegados á parede do antigo Bar Óscar, eliminando así unha praza de estacionamento que, aseguran, era utilizada habitualmente polos veciños.
Na mesma zona atopábase anteriormente un contedor en forma de corazón destinado á recollida de tapóns, que, segundo lembran, permaneceu no lugar sen impedir o acceso dos vehículos ás vivendas.
Os veciños consideran que a instalación dos pivotes estaría relacionada coa existencia dun vado concedido nunha lexislatura anterior. Segundo a súa versión, trataríase dun vado que consideran irregular, xa que aseguran que non existe un garaxe ao que acceder e que a placa estaría duplicada co mesmo número de licenza en dous solares diferentes, sen acceso para vehículos.
Dúas reunións co Concello
Os residentes da rúa do Campo aseguran que mantiveron dúas reunións co consistorio para solicitar a retirada dos pivotes, pero denuncian que as súas peticións non foron atendidas.
Segundo explican, a principal resposta recibida é que o espazo debe permanecer libre para permitir a entrada e manobra dun vehículo. Os veciños cuestionan este argumento e aseguran que, na práctica, ese vehículo non tería acceso a ningún garaxe.
“Se houbo durante anos unha cabina telefónica e posteriormente un contedor de tapóns de grandes dimensións nese mesmo lugar, nunca tivemos problemas para acceder ás nosas casas co coche”, sinalan.
Os afectados consideran, polo tanto, que a eliminación da praza de aparcamento non está suficientemente xustificada e reclaman que se revise a situación e se busque unha solución que permita compatibilizar o acceso aos inmobles co estacionamento dos residentes.
Os veciños cuestionan tamén a legalidade do vado
No escrito remitido aos medios, os residentes expresan tamén as súas dúbidas sobre a legalidade da autorización do vado. Chegan a sinalar que, se se demostrase que unha resolución administrativa foi ditada de maneira arbitraria e contraria á normativa, poderían existir responsabilidades legais.
Neste sentido, os veciños reclaman que se revise a concesión do vado e a súa situación administrativa, e que se esclareza se cumpre todos os requisitos establecidos pola normativa.
Problemas cos colectores do lixo
Á problemática do aparcamento súmase, segundo os residentes, outra cuestión que consideran especialmente preocupante: a situación dos colectores de lixo.
Os veciños aseguran que solicitaron que estes colectores fosen trasladados ao porto, debido, segundo denuncian, á falta de limpeza e ás molestias que ocasionan na zona.
Consideran que o estado dos colectores está a xerar un problema de salubridade e lamentan que, a pesar de ter trasladado esta petición ao Concello, a solución comprometida non se materializase.
Os residentes do Rueiro do Campo reclaman agora que o Concello revise ambas as situacións —a instalación dos pivotes e a localización e mantemento dos colectores— e que dea resposta ás peticións formuladas polos veciños.
Os afectados achegan fotografías da situación e agardan que a súa denuncia sirva para dar visibilidade a un problema que, segundo aseguran, leva demasiado tempo sen solución.
