Dous socorristas do servizo de vixilancia de Carballo rescataron este mércores un mozo de 22 anos que quedara atrapado pola corrente na praia de Pedra do Sal. O incidente produciuse nunha zona próxima ás pedras, onde o baño está prohibido.
Segundo explicaron desde o servizo, o mozo atopábase bañándose nunha área non habilitada cando foi sorprendido pola corrente e tivo dificultades para regresar á beira.
Os feitos ocorreron cando os socorristas estaban a piques de finalizar a súa xornada. Desde a caseta observaron o que estaba a suceder e desprazáronse rapidamente ata o lugar para auxiliar o bañista.
O rescate desenvolveuse con rapidez e rematou con éxito, sen que se rexistrasen consecuencias graves.
Desde o servizo de socorrismo aproveitan o sucedido para lembrar a importancia de bañarse exclusivamente nas zonas habilitadas e de respectar en todo momento as indicacións dos profesionais, especialmente en áreas próximas ás rochas, onde as correntes poden resultar perigosas.