A Asociación de Xuristas Animalistas (ADJA) presentou un requirimento formal previo á vía contencioso-administrativa contra o Concello de Vimianzo polo presunto incumprimento das súas obrigas legais en materia de xestión das colonias felinas.
A entidade sinala que os concellos deben garantir unha xestión adecuada das colonias de gatos comunitarios, de acordo coas obrigas establecidas pola Lei 7/2023, de protección dos dereitos e o benestar dos animais.
Entre as actuacións que deben desenvolver as administracións locais están a elaboración dun Programa de Xestión de Colonias Felinas, a dotación dun orzamento específico, a aplicación do método CER (Captura, Esterilización e Retorno), a identificación dos animais e a prestación de atención sanitaria cando sexa necesaria.
ADJA lembra, ademais, que estas actuacións deben estenderse a todo o termo municipal e non limitarse exclusivamente aos núcleos urbanos.
Desde a asociación explican que o requirimento presentado constitúe un paso previo antes de acudir, se fose necesario, á vía xudicial para reclamar o cumprimento das obrigas legais correspondentes.
ADJA ofrece asesoramento ás persoas coidadoras
A Asociación de Xuristas Animalistas anima ás persoas que coidan colonias felinas e consideran que o seu concello non está cumprindo coas obrigas previstas na normativa a poñerse en contacto coa entidade.
As persoas interesadas poden escribir a juristasanimalistas@gmail.com ou chamar ao 639 97 93 18 para recibir información sobre a posibilidade de presentar un requirimento ante o seu concello.
A iniciativa busca reclamar que a xestión das colonias felinas se realice conforme á normativa vixente e que as administracións locais adopten as medidas necesarias para garantir o benestar dos gatos comunitarios.