Veciños da Laracha denuncian o preocupante estado dalgúns tramos das estradas do municipio, especialmente pola presenza de maleza e pola falta de poda das árbores, que en determinados puntos invaden a vía e dificultan a circulación.
A situación chega a ser especialmente problemática nalgunhas estradas, onde a vexetación medrou tanto que practicamente non permite o paso con normalidade, reducindo a visibilidade e aumentando o risco para os condutores.
Ante esta situación, os propios veciños aseguran que nalgúns puntos se viron obrigados a colaborar e limpar ramas e maleza que invadían as estradas, ante a falta dunha actuación rápida por parte das administracións responsables.
«Criticamos a situación da maleza e a falta de poda, pero tamén nos dedicamos nós a limpar algunhas ramas das estradas da Laracha porque xa logo non se pode pasar», sinalan con indignación.
Os afectados reclaman que se realicen labores periódicos de limpeza, desbroce e poda para garantir a seguridade viaria e evitar que a situación empeore. Consideran «vergoñento» que os veciños teñan que asumir tarefas que deberían estar solucionadas mediante un adecuado mantemento das vías.
A petición é clara: máis atención, máis limpeza e un mantemento regular das estradas da Laracha antes de que a situación poida provocar algún incidente.