Os Bombeiros de Arteixo localizaron este domingo o corpo sen vida dun home de 65 anos no interior dunha vivenda que quedou completamente calcinada tras un grave incendio ocorrido no lugar de Rañobre, na parroquia de Oseiro, no municipio de Arteixo.
O suceso produciuse a primeira hora da mañá. O servizo de emerxencias 112 Galicia recibiu o aviso da Garda Civil arredor das 07:15 horas, alertando de que un inmoble unifamiliar estaba a arder e de que no seu interior podería haber unha persoa atrapada, que non respondía ás chamadas telefónicas.
Ata o lugar desprazáronse os Bombeiros de Arteixo e os efectivos de emerxencias, que traballaron na extinción do incendio. As lapas calcinaron por completo a vivenda.
Unha vez controlado o lume, os bombeiros iniciaron os labores de desescombro e arrefriamento da zona. Durante estes traballos localizaron o cadáver da vítima, que se atopaba sepultado baixo os cascallos nunha das habitacións da vivenda.
Os primeiros indicios apuntan a que o incendio puido iniciarse no dormitorio, aínda que as causas exactas do lume están a ser investigadas polas autoridades competentes.