A formación denuncia que o horario dificulta a asistencia da veciñanza e cuestiona os criterios para publicar as gravacións das sesións
Arteixo.— Alternativa Enxebre volveu poñer o foco no horario dos plenos municipais de Arteixo e na accesibilidade das gravacións das sesións. A formación critica que o Goberno municipal do PP manteña os plenos ás 9:30 horas da mañá, unha franxa que, ao seu xuízo, dificulta a asistencia da maioría da veciñanza ao coincidir coa xornada laboral.
Desde Alternativa Enxebre sinalan que “practicamente non asiste ninguén” aos plenos municipais e consideran que manter este horario dificulta que os veciños e veciñas poidan coñecer directamente o debate político municipal, así como as preguntas formuladas pola oposición, as respostas do Goberno e o sentido do voto de cada grupo.
A formación reclama que as sesións plenarias se celebren nun horario que facilite unha maior participación cidadá. “A participación cidadá non consiste unicamente en dicir que os plenos son públicos”, sinalan, defendendo que tamén é necesario facilitar que a cidadanía poida asistir, informarse e participar na vida municipal.
Críticas á publicación das gravacións
Alternativa Enxebre tamén cuestiona o funcionamento da publicación das gravacións dos plenos. Segundo a formación, as sesións son gravadas e posteriormente deben quedar á disposición da cidadanía, pero denuncia que non existe un criterio regular na súa publicación.
A formación asegura que algunhas gravacións aparecen antes e outras despois e que determinadas sesións tardan en estar accesibles. Neste sentido, reclama explicacións sobre os prazos e criterios empregados para poñer os vídeos á disposición da cidadanía.
“Por que non se publican todas as gravacións coa maior brevidade posible?”, pregunta a formación, que tamén reclama coñecer “quen decide cando se publica cada unha e baixo que criterio”.
Unha reivindicación que vén de anos atrás
A formación asegura que leva anos reclamando cambios no funcionamento dos plenos municipais e defende a necesidade de avanzar cara a unha maior transparencia e participación.
Alternativa Enxebre considera especialmente relevante esta cuestión nun municipio de máis de 30.000 habitantes, ao entender que o tamaño da poboación fai necesario facilitar o acceso da veciñanza ás institucións municipais.
A formación reclama así “máis transparencia, máis participación cidadá e uns horarios que permitan achegar o Pleno á veciñanza, non afastala del”.
Finalmente, Alternativa Enxebre lembra que o Concello debe estar ao servizo do conxunto da cidadanía e conclúe que “o Concello é de todos os veciños e veciñas de Arteixo”, e non dunha determinada formación política ou dunha maioría absoluta.