Os populares aseguran que tardaron case dúas horas en localizar o servizo e critican o seu actual emprazamento, oculto tras unha valado e entre maleza e residuos
O Partido Popular de Paderne denuncia a situación na que se atopa o punto limpo móbil do municipio e cuestiona a falta de información e visibilidade deste servizo público para os veciños.
Segundo explican os populares, realizaron un percorrido polas distintas parroquias de Paderne durante case dúas horas coa finalidade de localizar o punto limpo móbil. Finalmente, aseguran que foi un veciño quen lles indicou o lugar no que se atopa o contedor, sinalando ademais que leva máis dun mes instalado nese mesmo emprazamento.
Unha vez localizado, o PP asegura que se atoparon cun contedor situado detrás dunha valado, entre maleza, residuos e outros materiais, unha situación que, ao seu xuízo, dificulta a súa identificación e acceso por parte da cidadanía.
Os populares cuestionan así se as condicións actuais permiten realmente facilitar a reciclaxe aos veciños e consideran insuficiente a información existente sobre a localización do servizo.
“¿Isto é facilitar a reciclaxe aos veciños?”, preguntan desde o PP de Paderne, que tamén reclama saber cantos cidadáns coñecen a existencia e localización do punto limpo móbil despois de máis dun mes instalado.
A formación popular considera que, se é necesario percorrer durante case dúas horas o municipio e preguntar aos propios veciños para localizar un servizo público, “algo está fallando”.
O PP de Paderne anuncia que continuará realizando un seguimento da situación e comprometese a seguir trasladando á opinión pública as condicións nas que se atopan os servizos municipais.
