A formación critica a falta de seguimento do Goberno local do PP sobre o contrato de mantemento e limpeza dos areais
Fisterra, 7 de setembro de 2026. — Alternativa dos Veciños de Fisterra denuncia o que considera unha falta de control por parte do Goberno local do PP sobre o servizo de mantemento e limpeza das praias do municipio. A formación asegura que, a pesar das melloras comprometidas pola empresa adxudicataria no contrato, a situación dos areais e dos seus accesos evidencia, ao seu xuízo, importantes incumprimentos.
Segundo explica Alternativa, a empresa obtivo a máxima puntuación na adxudicación do servizo, con 100 puntos, ao incluír entre as súas propostas diversas melloras. Entre elas figuraban tres cribados mecánicos da area, unha prestación pola que obtivo os 20 puntos correspondentes a este apartado.
Porén, a formación política afirma que, cando a tempada estival está a rematar, só se realizou un destes tres cribados, polo que reclama explicacións sobre os dous restantes e sobre o control que está exercendo o Concello para garantir o cumprimento das condicións do contrato.
Alternativa dos Veciños tamén denuncia deficiencias na limpeza dos accesos e dos areais. Asegura que existen zonas con acumulación de residuos e argazo e lembra que os pregos do contrato contemplan obrigas relacionadas coa limpeza diaria, as podas e a retirada de residuos.
A formación opositora pon o foco especialmente no Prego de Cláusulas Administrativas, que, segundo sinala, establece mecanismos de penalización ante o incumprimento das melloras ofertadas pola empresa. Entre as medidas previstas, apunta, estarían multas de ata o 30 % do importe do contrato, a execución das garantías ou mesmo a rescisión contractual, nos supostos establecidos no propio prego.
Así mesmo, Alternativa asegura que o contrato contempla a obriga da Concellería de Urbanismo de realizar un seguimento material do servizo mediante partes de traballo. Para a formación, o problema non estaría unicamente nos posibles incumprimentos da empresa, senón tamén na falta de supervisión municipal.
“Onde está o Concello esixindo o cumprimento?”, cuestiona Alternativa dos Veciños, que considera que a ausencia de control estaría permitindo manter un servizo que cualifica de deficiente e que se financia con fondos públicos.
A formación reclama ao alcalde e ao equipo de goberno que actúen de inmediato, apliquen as penalizacións previstas nos pregos e efectúen, se corresponde, os descontos nas facturas, co obxectivo de garantir que o Concello reciba o servizo contratado.
Alternativa dos Veciños de Fisterra considera, finalmente, que a conservación dos areais e dos seus accesos debe ser unha prioridade, tanto pola súa importancia ambiental como polo seu impacto na veciñanza e nos visitantes, e acusa ao Goberno local de manter unha actitude de “deixadez de funcións” na supervisión do contrato.
