Nove vehículos sufriron danos e a circulación quedou interrompida nos carrís en sentido Lugo
Tres persoas resultaron feridas este mércores nunha colisión en cadea rexistrada na autovía A-54, ao seu paso pola parroquia de Sabugueira, en Santiago de Compostela. O accidente produciuse no punto quilométrico 85 e viuse implicado un total de nove vehículos.
Ás 8:30 horas, o 112 Galicia recibiu varios avisos que alertaban dun accidente na autovía. As persoas que contactaron co servizo de emerxencias informaron dunha colisión múltiple, aínda que inicialmente non puideron concretar o número de vehículos implicados nin confirmar se había persoas feridas.
Ante esta situación, e por precaución, os xestores do Centro Integrado de Atención ás Emerxencias solicitaron a intervención dos servizos de Urxencias Sanitarias de Galicia-061.
Finalmente, tres persoas tiveron que ser evacuadas ao Hospital de A Rosaleda para recibir atención médica. Ademais, nove vehículos sufriron danos materiais como consecuencia do sinistro.
Segundo indicou un dos alertadores, a orixe da colisión podería estar relacionada cos efectos do sol sobre a condución, aínda que as circunstancias do accidente deberán ser determinadas polos axentes encargados da investigación.
O 112 Galicia mobilizou tamén a Garda Civil de Tráfico e a Policía Local de Santiago. Inicialmente, o aviso foi trasladado aos Bombeiros de Santiago, aínda que finalmente non foi necesario realizar ningún rescate.
Como consecuencia do accidente, a circulación permaneceu interrompida nos carrís da A-54 en sentido Lugo mentres se atendía ás persoas afectadas e se retiraban os vehículos implicados.
