O incidente produciuse na parroquia de Santaia de Gorgullos e parte do xurro chegou a unha ladeira que conduce cara ao río de Bustelo
Unha fosa de xurro sufriu unha rotura na noite deste luns na parroquia de Santaia de Gorgullos, no concello de Tordoia, provocando o vertido de centos de miles de litros de purín e obrigando a activar un operativo de vixilancia para evitar posibles afeccións ao río de Bustelo.
O aviso foi recibido polo 112 Galicia preto das dez da noite, cando un gandeiro da zona alertou das dificultades para controlar a fuga de xurro.
Ata o lugar desprazáronse axentes da Garda Civil, que comprobaron que a perda se producira como consecuencia da rotura do muro de contención dunha fosa na que estaban almacenados máis dun millón de litros de líquido.
Segundo as primeiras estimacións realizadas polos axentes, aproximadamente un terzo do contido da fosa podería terse vertido. O xurro descendeu por unha ladeira en dirección ao río de Bustelo, o que levou a activar medidas de control e seguimento do curso fluvial.
Seguindo as indicacións dos técnicos do Centro de Control de Vertidos de Augas de Galicia, o 112 Galicia comunicou a situación aos concellos situados augas abaixo, co obxectivo de que extremasen a vixilancia sobre o río ante unha posible chegada do vertido.
Nas próximas horas está previsto que se leven a cabo controis e tomas de mostras de auga, que permitirán determinar o alcance da contaminación e comprobar se o vertido chegou efectivamente ao curso fluvial.
As autoridades manterán a vixilancia da zona mentres se avalían os posibles efectos ambientais provocados pola rotura da fosa.
