O lume produciuse na tarde deste luns na parte traseira das instalacións e non deixou feridos
Un incendio declarado na tarde deste luns no obradoiro de Pan Ignacio, en Vimianzo, causou importantes danos nas instalacións da empresa. O lume afectou principalmente á parte traseira do establecemento e obrigou a mobilizar os servizos de emerxencias para controlar as lapas.
No momento en que se iniciou o incendio non había ningunha persoa no interior do obradoiro, polo que non houbo que lamentar feridos. Así o confirmou o xerente de Pan Ignacio, Fernando Espasandín, que explicou que a orixe do lume permanece polo momento descoñecida.
As consecuencias materiais son importantes, especialmente na zona do obradoiro afectada directamente polo incendio. A empresa está agora a avaliar os danos ocasionados e as posibilidades para recuperar a actividade habitual.
O sinistro produciuse, ademais, nunha xornada especialmente significativa para Pan Ignacio, xa que a empresa estaba a celebrar a renovación do seu recoñecemento entre as 50 mellores panaderías de España.
Traballos para recuperar a actividade
Tras o incendio, Pan Ignacio está a reorganizar a súa produción para tratar de manter abertas as súas tendas. Os obradoiros de Carballo e Cee, que continúan operativos, servirán de apoio para abastecer os establecementos.
Porén, a capacidade destes dous centros non permite asumir toda a produción que se realizaba en Vimianzo, polo que inicialmente a empresa non poderá recuperar con normalidade os repartos nin o servizo aos clientes da hostalería.
Mentres se investigan as causas do incendio e se cuantifican os danos, Pan Ignacio traballa para recuperar progresivamente a súa actividade.
